Palestine Song - Palästinalied

Palestine Song - Palästinalied

 

Nû alrêst lebe ich mir werde,

sît mîn sündic ouge siht

daz here lant und ouch die erde,

der man sô vil êren giht.

ez ist geschehen, des ich ie bat,

ich bin komen an die stat,

dâ got menischlîchen trat.

Schoeniu lant, rîch unde hêre,

swaz ich der noch hân gesehen,

sô bist dûz ir aller êre.

waz ist wunders hie geschehen!

daz ein magt ein kint gebar,

hêre über aller engel schar,

was daz niht ein wunder gar?

Dô er sich wolte übr uns erbarmen,

hie leit er den grimmen tôt,

er vil rîche übr uns vil armen,

daz wir komen ûz der nôt.

daz in dô des niht verdrôz,

dâst ein wunder alze grôz,

aller wunder übergnoz.

Kristen, juden und die heiden

jehent, daz diz ir erbe sî.

got müez ez ze rehte scheiden

durch die sîne namen drî.

al diu welt, diu strîtet her:

wir sîn an der rehten ger.

reht ist, daz er uns gewer.

Vrowe min, durch iuwer güete

nu vernemet mine clage,

daz ir durch iuwer hochgemüete

nicht erzuernet, waz ich sage.

Vil lihte daz ein tumber man

misseredet, als er wol kann.

daran solt ir iuch nicht keren an