Hawaii is the Best - Hawaiʻi No E Ka ʻOi

Hawaii is the Best - Hawaiʻi No E Ka ʻOi

 

ʻO Maunakea kū kilakila

Me ka wai huʻi aʻo Wai`au

Wai huʻi anu, huʻi konikoni

Huʻi konikoni, koni i ka ʻili

I ka piko o Maunakea

Hawaiʻi no e ka ʻoi

 

E ʻalawa iho ia Maunaloa

I ke kahela mai i ka laʻi

Kohu moa kea, i ka mālie

Ka waiho mai, la i ka laʻi

I ka poli o Wahinekapu

Hawaiʻi no e ka ʻoi

 

E kilohi aʻe ʻoe i ka nani

O ke kuahiwi ʻo Hualālai

Alaʻi ana, ka makani ʻEka

Hoʻohaehae, i ka naulu

Me ka uhiwai o ka uka

Hawaiʻi no e ka ʻoi

 

Haʻina mai ana ka puana

Na kuahiwi nani `ekolu

ʻO Maunakea, kū kilakila

ʻO Maunaloa, kau i ka hano

ʻO Hualālai i ka laʻi

Hawaiʻi no e ka ʻoi